سرپرست و دو معین به وزارت مالیه معرفی شدند 13 جوزا 1402 سرپرست جدید وزارت مالیه، معین عواید و گمرکات و معین امور مالی از سوی مسئولین اداره امور و دیگر مسؤلین بلند پایه امارتی طی یک سلسله مراسم خاص معرفی گردیدند. بر اساس حکم امیرالمؤمنین ملا هبة الله آخندزاده (حفظه الله) زعیم امارت اسلامی افغانستان الحاج ملا محمد ناصر آخند، معین قبلی عواید و گمرکات وزارت مالیه، به صفت سرپرست این وزارت معرفی گردید. ملا عبدالقاهر ادریس معین پیشین معینیت انرژي وزارت انرژی و آب به صفت سرپرست معینیت عواید و گمرکات وزارت مالیه معرفی گردید. حاجی عبدالقدیر احمد معاون دوم د افغانستان بانک به صفت معین مالی وزارت مالیه به کارمندان این وزارت معرفی گردید. در مراسم معرفی، الحاج ملا هدایت الله بدری رئیس د افغانستان بانک، مولوی سیف الدین تائب معین نظارت و پالیسی اداره امور، مولوی حمدالله زاهد معین اداری وزارت مالیه، انجنیر سلطان محمد زبیر رئیس دفتر مقام وزارت مالیه و دیگر مقامات بلند رتبه اشتراک داشتند.
