د ګمرکونو لوی ریاست د رهبرۍ له لوري د کابل ګمرک ریاست ته نوی سرپرست رئیس ور وپیژندل شو

ښاغلی مولوي محمد داوود ایوبي چې د ګمرکونو لوی ریاست په وړاندیز او د مالیې وزارت مقام په منظورۍ د کابل ګمرک لپاره د نوي سرپرست رئیس په توګه ټاکل شوې، تېره ورځ د ګمرکونو لوی رئیس ښاغلي الحاج مفتي عبدالمتین سعید له لوري د یاد ګمرک کارکونکو ته ور وپیژندل شو.
په دې پیژندغونډه کې چې د ګمرکونو لوی ریاست مرستیالانو، د مالیې وزارت د کورنۍ پلټنې لوی رئیس او د کابل ګمرک یو شمېر کارکونکو ګډون کړې وو، د ګمرکونو لوی رئیس د کابل ګمرک د پخواني رئیس له کړنو مننه وکړه او نوي رئیس ته یې په چارو کې د بریالیتوب هیله وکړه. نوموړي د کابل ګمرک کارکونکو ته سپارښتنه ورکړه چې له نوي ټاکل شوي رئیس سره په اړوندو چارو کې پوره همکاري وکړي.
د یادونې وړ ده چې ښاغلی مولوي محمد داوود ایوبي له دې وړاندې د پکتیا ګمرک د رئیس په توګه دنده تر سره کوله.