د ډنډپټان او غلام خان په سرحدي ګمرکونو کې د قیمت ګذارۍ ماډیول پلي شو

د ګمرکونو لوی ریاست د کاري بهیر د چټکتیا او سوداګرو ته د لا اسانتیا رامنځته کولو په موخه د ډنډپټان او د غلام خان په سرحدي ګمرکونو کې د قیمت ګذارۍ ماډیول پلي کړ.
د دې ماډیول په پلي کیدو سره سوداګر کولی شي له خپل کار ځای او یا هم له هیواد څخه بهر د خپل یوزر له لارې د اسیکوډا په سیستم کې د نوي ټي اس سي (TSC) کوډ د غوښتلو فورمه ثبت کړي.
له دې وړاندې سوداګرو به د نوي ټي اس سي (TSC)کوډ د غوښتلو لپاره اړونده فورمه قلمي ډکوله او په فزیکي ډول به یې اړوند ګمرک ته سپارله چې طی مراحل یې څو ورځې نیولې، د یاد ماډیول په پلي کیدو سره اوس مهال د نوي ټي اس سي کوډ غوښتنه د سیستم له لارې په څو دقیقو کې تر سره کیږي.