د ګمرکونو لوی رئیس ښاغلي مفتي عبدالمتین سعید د بطریو د واردونکو شرکتونو له استازو سره وکتل

د ګمرکونو لوی رئیس ښاغلي مفتي عبدالمتین سعید تېره ورځ د بطریو د واردونکو شرکتونو او د بطریو او شمش یا سُربو د تولیدونکو فابریکو له استازو سره چې د افغانستان د سوداګرۍ او پانګونې خونې مرستیال ښاغلي محمد یونس مومند هم شتون درلود د ګمرکونو او عوایدو معینیت د غونډو په تالار کې وکتل.
د سوداګرۍ او پانګونې خونې مرستیال له افغانستان څخه د صادراتي شمش یا سُربو د ګمرکي قیمت او افغانستان ته د وارداتي بطریو د ګمرکي تعرفې او قیمت په اړه د سوداګرو او صنعتکارانو غوښتنې د ګمرکونو له لوی رئیس سره شریکې کړې د ګمرکونو لوی رئیس د صادراتي شمش یا سُربو د ګمرکي قیمت په برخه کې د سوداګرو غوښتنه ومنله او د وارداتي بطریو د ګمرکي تعرفې په اړه یې وویل چې واردونکي شرکتونه او د بطریو تولیدونکې فابریکې دې د سوداګرۍ او پانکونې او د صنعت او کانونو خونو له لارې د تعرفې د کموالي یا لوړوالي په اړه د ګمرکونو لوی ریاست ته عریضه وکړي او د ګمرکونو لوی ریاست به یاده موضوع د تعرفې کمېتې ته وړاندې کړي.