عالیقدر امیر المؤمنین د مالیې وزارت د گمرکونو له مسؤلینو سره وکتل

د افغانستان اسلامي امارت زعيم عاليقدر اميرالمؤمنين شيخ القرآن والحديث مولوي هبة الله اخندزاده حفظه الله د مالیې وزارت د ګمرکونو او عوايدو معين ښاغلی ملا محمد ناصر اخند، د ګمرکونو لوی رئيس ښاغلي مفتي عبدالمتين سعيد او د هيواد د ټولو ګمرکونو مسؤلين، تېره ورځ (۲۲/0۸/1444) خپل حضور ته وبلل. 
په پيل کي د مالیې وزارت د ګمرکونو او عوايدو معين او د ګمرکونو لوی رئيس د اسلامي امارت له حاکمېدو څخه نيولې بيا تر اوسه د خپلو کاري ساحو بشپړ راپور وړاندي کړ او تر څنګ ئې د اړوندو چارو د لا ښه والي لپاره له عاليقدر اميرالمؤمنين حفظه الله  سره خپل وړانديزونه هم شريک کړل.
د اسلامي امارت زعيم عاليقدر اميرالمؤمنين حفظه الله په خپله وينا کي بلل سوي مسؤلين، خپلو مسؤليتونو ته لا متوجه کړل او د راغلي اسلامي نظام د ښه خدمت کولو، ولس سره په ښه سلوک، سوداګرو ته د لازمو اسانتياوو په برابرولو او نورو اړوندو برخو کي یې ورته اړيني لارښووني وکړې.