د تعرفې او قیمت ګذارۍ پخوانیو ناسمو کوډونو د اصلاح په موخه تخنیکي کمېټه جوړه شوه

د ګمرکونو لوی رئیس ښاغلي مفتي عبدالمتین سعید تېره ورځ د تعرفې او قیمت ګذارۍ پخوانیو ناسمو کوډونو د اصلاح په موخه د تخنیکي کمېټې پرانېسته وکړه.
په دې پرانېست غونډه کې چې د ګمرکونو تخنیکي او عملیاتي مرستیالانو، یو شمېر رئیسانو او امرینو هم ګډون کړې وو، د ګمرکونو لوی رئیس وویل چې زموږ هڅه داده څو په ټولو برخو کې سوداګرو ته اسانتیاوې رامنځته کړو په همدې موخه مو د تعرفې او قیمت ګذارۍ پخوانیو ناسمو کوډونو د اصلاح لپاره کمېټه جوړه کړه.
نوموړي د یادې کمېټې غړو ته سپارښتنه وکړه چې ټاکل شوې موخې ته د رسیدو لپاره په پوره همغږۍ سره کار وکړي.
د یادونې وړ ده چې یاده کمېټه د تعرفې او قیمت ګذارۍ د برخې له تخنیکي کارکونکو څخه جوړه شوې چې دوی به د ملي عوایدو له ضایع کیدو څخه د مخنیوي او سوداګرو ته د اسانتیا رامنځته کولو په موخه پخواني ناسم جوړ شوي ټي اس سي کوډونه د تعرفې له کوډونو سره مطابق ورکړي او د اصلاح لپاره به یې خپل راپور د ګمرکونو لوی ریاست له رهبري سره شریک کړي.