په ګمرکونو کې د تعرفې او قیمت ګذارۍ برخې په تخنیکي ستونزو او حل لارو بحث وشو

په ولایتي ګمرکونو کې د تعرفې، قیمت ګذارۍ او د معافي اموالو د شته ستونزو د حل په موخه نن د ویډیو کنفرانس له لارې د ګمرکونو لوی رئیس ښاغلي مفتي عبدالمتین سعید په مشرۍ په ګمرکونو کې د یادو برخو له مسؤلینو سره ناسته جوړه شوه.
په دې ناسته کې چې د ګمرکونو لوی ریاست اړوندو مسؤلینو هم ګډون درلود، په پیل کې د ګمرکونو لوی رئیس ټولو ګډونوالو ته ښه راغلاست وویل او د ولایتي ګمرکونو د تعرفې او قیمت ګذارۍ برخې مسؤلینو ته یې سپارښتنه ورکړه چې هر جنس په خپل ځانګړي کوډ کې طی مراحل کړي څو په ټولو ګمرکونو کې اجراات یوشان شي.
نوموړي وویل چې که تاسو په یادو برخو کې ستونزې لرئ نو پر خپل وخت یې له مرکز سره شریکې کړئ څو رسیدنه ورته وشي.
د تعرفې، قیمت ګذارۍ او د ګمرکي سیستمونو رئیسانو په خپل وار سره په یادو برخو کې د شته ستونزو یادونه وکړه او د ولایتي ګمرکونو له اړوندو مسؤلینو څخه یې غوښتنه وکړه چې د یادو ستونزو حلولو ته جدي پاملرنه وکړي.
د ولایتي ګمرکونو د تعرفې او قیمت ګذارۍ برخې مسؤلینو هم خپلې ستونزې شریکې کړې چې د حل لپاره یې لازم هدایات او سپارښتنې ورکړل شوې.