د ګمرکونو لوی ریاست او د صنعت او سوداګرۍ وزارت تخنیکي کمیټې پر یو شمېر اړوندو موضوعاتو بحث وکړ

د ګمرکونو لوی ریاست او د صنعت او سوداګرۍ وزارت تخنیکي کمیټې لومړنۍ ناسته تېره ورځ د ګمرکونو او عوایدو معینیت د غونډو په تالار کې جوړه شوه.
په دې کمیټي کې صادراتو او وارداتو په برخه کې د اسانتیاوو پر رامنځته کولو، د ګمرکي تعرفې په برخه کې د ستونزو پر هواري، د سوداګریزو شرکتونو له لوري د انحصار او ایجنسۍ په برخه کې پر شته ستونزو او حل لارو او یو شمېر نورو اړوندو موضوعاتو بحث او د نظرونو تبادله وشوه او په اړه یې لازمې پریکړې ونیول شوې.
د یادونې وړ ده چې یاده تخنیکي کمېټه د ګمرکونو لوی ریاست او د صنعت او سوداګرۍ وزارت تر منځ د لا همغږۍ په موخه جوړه شوې ده او پر هغو موضوعاتو به بحث او خبرې کوي چې د دواړو ادارو اړوند وي.