د ګمرکونو لوی ریاست د پلان جوړونې، پالیسۍ، څارنې او ارزونې ریاست ته نوی رئیس وپیژندل شو

د مالیې وزارت په وړاندیز او د ا.ا.ا د ریاست الوزراء لوړ مقام په منظورۍ محمد شفیق حکمت، چې د ګمرکونو لوی ریاست د پلان جوړونې، پالیسۍ، څارنې او ارزونې نوی رئیس ټاکل شوی، نن د ګمرکونو او عوایدو معین الحاج مفتي عبدالمتین سعید له لوري اړوندو کارکوونکو ته ور وپیژندل شو. په دې پیژند غونډه کې، چې د ګمرکونو لوی ریاست عملیاتي مرستیال او یو شمېر رئیسانو ګډون کړې و، د ګمرکونو او عوایدو معین په ادارو کې د مسؤلینو بدلون یو اصل یاد کړ او نوي ټاکل شوي رئیس ته یې په اړوندو چارو کې د بریالیتوب هیله وکړه. نوموړي اړوندو کارکوونکو ته سپارښتنه وکړه، چې له نوي ټاکل شوي رئیس سره پوره همکاري او همغږي وکړي. د ګمرکونو او عوایدو معین د ګمرکونو په لوی ریاست کې د مسؤلینو تر منځ د رامنځته شوې همغږۍ ستاینه هم وکړه.  د یادونې وړ ده، چې محمد شفیق حکمت په اداري چارو کې زیاته کاري تجربه لري او له دې وړاندې د مالیې وزارت د کورنۍ پلټنې لوی ریاست اړوند د لومړۍ درجې مستوفیتونو د پلټنې د آمر په توګه دنده تر سره کوله.