د هیواد په شپږو ګمرکونو کې امنیتي کېمرې نصب او ګټې اخیستنې ته وسپارل شوې!

 د مالیې وزارت د ګمرکونو لوی ریاست له لوري د تورخم، ډنډپټان، خوست، غلام خان بندر، د نیمروز ولایت بندر والي او د ګمرکونو لوی ریاست د لابراتوار په څانګه کې (۲۱۵) امنیتي کېمرې نصب او فعالي کړې. د یادو امنیتي کېمرو په نصبېدو سره به د امنیتي مسایلو ترڅنګ د ګمرکي سرغړونو او د پېښو د مخنیوي په برخو کې هم د پام وړ مثبت بدلون رامنځته شي. دا کېمرې د یادو ګمرکونو په بېلابېلو برخو کې نصب شوي دي، چې په نيږدې راتلونکې کې به له پلازمېنې کابل سره هم ونښلول شي. د یادونې وړ ده، چې څه موده وړاندې د اسلام کلا او تورغونډۍ په سرحدي ګمرکونو کې هم ورته امنیتي کېمرې نصب او فعالي شوي وې.