د هیواد په څلورو ګمرکونو کې د نږدې (۵) میلیونه افغانیو په ارزښت د سړخونو د بیارغونې پروژه پیل شوه!

د مالیې وزارت د ګمرکونو لوی ریاست د (۴،۹) میلیونه افغانیو په ارزښت د (هرات، نیمروز، خوست او ننګرهار) په ګمرکونو کې د سړخونو د بیا رغونې پروژه پیل کړه.
د یادو سړخونو په رغېدو سره به د سبزیو، تازه مېوو، خوراکي توکو او درملو د خوندي او غوره ساتنې په برخه کې سوداګرو ته ګڼې اسانتیاوې رامنځته شي.
د دې پروژې لګښت د مالیې وزارت له پراختیایي بودیجې څخه ورکول کېږي او چارې به یې په درېیو میاشتو کې بشپړې شي.
د یادولو ده، چې د مالیې وزارت له لوري د هیواد د ګمرکونو د عصري کولو، بیارغونې او سوداګرو ته د لا ډېرو اسانتیاوو د رامنځته کولو په موخه بېلابېلي پراختیایي پروژې پلي شوي او یو شمېر یې د پلي کېدو په حال کې دي.