د ګمرکونو لوی ریاست تخنیکي او حمایوي مرستیال د نیمروز ولایت له یو شمېر سوداګرو سره وکتل

د مالیې وزارت د ګمرکونو لوی ریاست تخنیکي او حمایوي مرستیال ښاغلي خسرو انوري د وري میاشتې په ۳۱ مه نېټه نیمروز ولایت ته د رسمي سفر په لړ کې د یاد ولایت له شمېر ملي سوداګرو سره وکتل.

په دې کتنه کې دواړو لوریو د افغانستان د کابینې له پریکړې سره سم په ګمرکونو کې د کمیشنکارانو په لغو کیدو، د سوداګریزو شرکتونو له لوري د توکو ګمرکي طی مراحلو په موخه د اسیکوډا په سیستم کې په یوزر جوړولو، د نیمروز ولایت د سوداګرو په شته ستونزو او یو شمېر نورو مسایلو په اړه بحث او خبرې وکړې.

د ګمرکونو لوی ریاست تخنیکي او حمایوي مرستیال د نیمروز ولایت له سوداګرو نه غوښتنه وکړه چې د خپلو سوداګریزو توکو د ګمرکي طی مراحلو په موخه دې ژر تر ژره په اسیکوډا سیستم کې یوزر جوړ کړي.

همداشان ښاغلي انوري وویل چې مالیې وزارت رهبرۍ په ګمرکونو کې ملي سوداګرو ته د اسانتیا برابرولو ته ژمن دی او دوی ته یې ډاډ ورکړ چې ستونزو ته به یې رسیدنه وشي.