د ګمرکونو لوی ریاست دریو ګمرکونو ته د څه باندې (۵۲) میلیونه افغانیو په ارزښت درې عرادې کرینونه وپېرل!

د مالیې وزارت د ګمرکونو لوی ریاست په هيواد کې د سوداګرۍ بهیر د لا چټکتیا او د سوداګریزو توکو د تخلیې او بارګیرۍ په برخه کې د اسانتیا را منځته کولو په موخه د څه باندې (۵۲) میلیونه افغانیو په ارزښت د فراه، کندهار او خوست ګمرکونو له پاره درې عرادې کرینونه وپېرل. د یادو کرینونو په پېرلو سره به په اړوندو برخو کې د سوداګرو ستونزې حل او د ملي عوایدو په زیاتوالي کې به هم اغېزمن رول ولري.  د یادولو ده، چې ډېر ژر به د هیواد نورو ګمرکونو ته (۸) عرادې پېرل شوي کرینونه تسلیم او ګټې اخیستنې ته وسپارل شي.