د نیمروز په ګمرک کې د ۳۲ میلیونه افغانیو په ارزښت د موټرونو تمځای جوړ شو!

د مالیې وزارت د ګمرکونو لوی ریاست د څه باندې (۳۲) میلیونه افغانیو په ارزښت د نیمروز ولایت په ګمرک کې د موټرونو له پاره تمځای جوړ او ګټې اخیستنې ته وسپاره.
دغه تمځای په (۴،۵) جریبه ځمکه کې جوړ شوی او پر یوه مهال د (۱۳۰) لویو باروړونکو موټرونو د درېدو ظرفیت لري. د موټرونو په دې تمځای کې په اساسي ډول کانګرېټ اچونه شوې او د ټولو لازمو اسانتیاوو درلودونکی دی، چې ورسره به موټر چلوونکو، سوداګرو او د ګمرک کارکوونکو ته په بېلابېلو برخو کې ګڼې اسانتیاوې برابرې شي.
د دغې پروژې مالي لګښت د مالیې وزارت له پراختیایي بودیجې څخه ورکړل شوی او چارې یې هم د یوه افغاني شرکت له لوري په (۹) میاشتو کې بشپړې شوې. همدارنګه د (۵) سوه زره افغانیو په ارزښت د نیمروز ولایت ګمرک د هنګرونو د بیارغولو پروژه هم بشپړه او ګټې اخیستنې ته وسپارل شوه.