د پکتیکا په ګمرک کې د لمریزي برېښنا سیسټم جوړ او ګټې اخیستنې ته وسپارل شو

د مالیې وزارت له د ګمرکونو د عصري کولو او برېښنایي سیسټمونو د فعالولو په لړ کې، د ګمرکونو لوی ریاست د پکتیکا ګمرک د برېښنا چمتو کولو له پاره د (۷،۲) میلیونه افغانیو په ارزښت د (۶۰) کیلو واټه په ظرفیت سره د لمریزې برېښنا سیسټم جوړ او ګټې اخیستنې ته وسپاره. له دې وړاندې په یاد ګمرک کې له جنراټور څخه ګټه اخیستل کېده، چې په میاشتني ډول یې شاوخوا (۲) زره لېټره تېل مصرفول. د لمریزې برېښنا سیسټم په فعالولو سره له یوې خوا د تېلو په لګښت کې سپما راځي او له بلې خوا د یاد ګمرک په کارونو کې هم چټکوالی رامنځته کېږي. د یادونې وړ ده، چې د مالیې وزارت په دې هڅه کې ده، چې د هیواد په ټولو ګمرکونو کې سوداګرو او کارکوونکو ته د اسانتیاوو رامنځته کولو په موخه اړین تجهیزات او امکانات برابر کړي.