د بلخ ولایت د سوداګرو ستونزې واوریدل شوې

بلخ ولایت ته د افغانستان اسلامي امارت د اقتصادي معاونیت او د ګمرکونو لوی ریاست تللي پلاوي، تېره ورځ د بلخ ګمرک د رئیس الحاج مولوي محمد عبدالله بلال په شتون کې د یاد ولایت د سوداګرۍ او پانګونې خونې له مسؤلینو او یو شمېر سوداګرو سره وکتل، په دې کتنه کې د بلخ ګمرک او د دې ولایت د سوداګرۍ او پانګونې خونې تر منځ د همغږۍ په زیاتوالي، د سوداګرو پر شته ستونزو او حل لارو بحث او خبرې وشوې. د بلخ ولایت د سوداګرۍ او پانګونې خونې استازو د سوداګرۍ پر وړاندې د شته ستونزو یادونه وکړه او له تللي پلاوي څخه یې وغوښتل، چې په هیواد کې د سوداګرۍ د لا ودې په موخه د سوداګرو ستونزو ته رسیدنه وکړي. د تللي پلاوي په استازیتوب د اقتصادي معاونیت د حقوقي چارو رئیس مولوي احسان الله خبرې وکړې او د بلخ ولایت سوداګرو ته یې ډاډ ورکړ، چې ژر به شته اصولو ته په کتو سره د دوی ستونزو ته رسیدنه وشي.