د ګمرکونو لوی ریاست تخنیکي پلاوي د هرات، نیمروز او فراه ګمرکونو چارې و ارزولې

د ګمرکونو لوی ریاست د عملیاتي مرستیال ښاغلي نقیب الله عابد په مشرۍ تخنیکي پلاوي هرات، نیمروز او فراه ولایتونو ته رسمي سفر وکړ او هلته یې د یادو ولایتونو د ګمرکونو چارې له نږدې څخه و ارزولې.
یاد تخنیکي پلاوي د هرات، نیمروز او فراه ګمرکونو د ورځنیو چارو شته ستونزې په ګوته کړې او د حل لپاره یې اړوندو مسؤلینو ته لازم هدایات ورکړل.
د یاد سفر موخه پر خپل وخت سره د ګمرک د کارکوونکو او سوداګرو ستونزو ته رسیدنه او په سمه توګه د ګمرکي اصولو پلي کول وو.
د یادونې وړ ده، چې د ګمرکونو لوی ریاست تخنیکي ټیمونه له دې وړاندې هم د ولایتي ګمرکونو د روانو چارو د ارزونې په موخه سفرونه کړي، چې دا لړۍ به همداسې دوام ولري.