د ګمرکونو لوی رئیس د کندهار، نیمروز او فراه ګمرکونو له رئیسانو سره په یو شمېر ګمرکي مسایلو خبرې وکړې.

د ګمرکونو لوی رئیس الحاج مفتي عبدالمتین سعید، چې د یو پلاوي په مشرۍ کندهار ولایت ته په رسمي سفر تللی، هلته یې د کندهار، نیمروز او فراه ګمرکونو له رئیسانو سره د کندهار ګمرک په ریاست کې وکتل. په دې کتنه کې د ګمرکونو لوی رئیس دوی ته په سمه توګه د سوداګریزو توکو د تشریح، بیې ایښودنې، بررسۍ او لابراتوار، پر خپل وخت سره د سوداګرو او نورو مراجعینو ستونزو ته په رسیدنې، د سوداګریزو توکو د چټکو طی مراحلو لپاره له ټاکل شوي وخت څخه د زیات کار کولو، د کارکوونکو تر منځ د لازمې همغږۍ رامنځته کیدو، د چارو د لا ښه والي او روڼتیا رامنځته کیدو په موخه د اداري سلسله مراتبو د مراعتولو او اطاعت پذیرۍ او ځینو نورو برخو کې لازمې سپارښتنې وکړې.د ګمرکونو لوی رئیس په ۱۴۰۲ مالي کال کې د یادو ګمرکونو تر سره شوې کړنې، فعالیتونه او لاسته راوړنې وستایلې او د دې ګمرکونو له مسؤلینو او کارکوونکو څخه یې مننه وکړه.